Virkisleiðari á landingarmiðstøð: "Møguleikar eru í slógvinum"

Virkisleiðarin á Landingarmiðstøðini á Toftum, Arnhold Davidsen, leggur seg nú út í kjakið um at føra alt lívfrøðiligt tilfeingi frá fiskiveiðuni til lands.

"Aðalendamálið við at dríva vinnuligum fiskiskap eigur at vera at fáa so mest burturúr tilfeinginum, sum verður veitt, og har eru stórir møguleikar í tí, sjálvt um tað ikki er løtuvinningur," sigur Arnhold Davidsen.

Tørvur er eisini á at fáa eitt fjølbroyttari kjak um møguleikarnar, sum eru í slógvinum, heldur virkisleiðarin.

Kallig móttøka

Landsstýrismaðurin í fiskivinnumálum hevur sent kunngerð til hoyringar, um at longu frá 1. juni í ár skulu 20 prosent av tí, sum annars verður blaðkað í havið av skipum og bátum, takast vil til lands í Føroyum. Og um seks ár, skal alt av fiski takast við til lands.

Uppskotið fær kalliga móttøku av formanninum í Fiskimannafelagnum, Jan Højgaard, og formanninum í Felagnum línuskip, Hálvdan Gudmundsen.

Arnhold Davidsen

Arnhold Davidsen, virkisleiðari á Landingarmiðstøðini á Toftum

Á landingarmiðstøðini á Toftum sær man ikki líka neiliga upp á ætlanirnar hjá landsstýrismanninum. 

Fyri fýra árum síðani gjørdi Landingarmiðstøðin á Toftum íløgur í útgerð, so at innvølurin eisini kann gagnnýtast, og tá byrjaði landingarmiðstøðin eisini taka móti blóðgaðum fiski.

"Eg síggi møguleikar fyri serliga bátar í bólki 5 (útróðrarbátar undir 15 tons á húkaveiðu, blaðm.) og partvíst fyri bátar í bólki 4 (smærri línubátar, blaðm.). Teir kunnu taka innvølin feskan við til lands, tí vit kunnu taka ímóti innvølinum," staðfestir Arnhold Davidsen, virkisleiðari á Landingarmiðstøðin á Toftum.  

Gjørt íløgu í útgerð

Kostnaður fyri at landa blóðgaðan fisk er 2,80 krónur fyri kilo. At landa kruvdan fisk kostar 1,80 krónur fyri kilo.

"Sjómaðurin fær nakað fyri ómakin," sigur Arnhold Davidsen, virkisleiðari. Ein háttur at lagra innvøl er at súrga hann, og tað ger landingarmiðstøðin á Toftum.

Í dag keypir Havsbrún súrløguna frá landingarmiðstøðini. Men kann landingarmiðstøðin ikki taka meira fyri súrløguna, so okkurt dettur á kistubotnin hjá teimum, sum føra veiðuna um bryggjukantin?