Nevndarlimur í Lærarafelagnum undrast yvir landsroynd í náttúru og tøkni

Landsroyndir eru kring landið í vikuni. Tað eru næmingar í 4. og 6. flokki, sum eru til roynd. Aftur hesa ferð eru royndirnar í føroyskum, støddfrøði og náttúru & tøkni. 

Jona Højsted, nevndarlimur Føroya Lærarafelag, undrast yvir, at tað verður hildið fast við landsroyndunum í náttúru og tøkni. 

- Eg havi ómetaliga trupult við at skilja, hví hendan lærugreinin er við. Náttúrufakini eru so ómetaliga fjølbroytt. Tað eru nærum óendaliga nógv evni, vit kunnu arbeiða við, samstundis, sum tað eftir míni sannføring er eitt fak, har tú skalt læra arbeiðshættir heldur enn uttanatslæru, ella at læra at sláa upp í eini bók, sigur Jona Højsted við Skúlablaðið. 

Hon vísir samstundis á, at royndir kunnu vera góðar, tá tær kunnu brúkast til okkurt skilagott, men tað finnast eisini royndir, ið køva meiri enn tær gagna. Landsroyndin í náttúru & tøkni kemur undir tað seinna, sigur nevndarlimurin í lærarafelagnum.