Oyggjaleikirnir í Føroyum við føroyskum høvuðsstuðli

Oyggjaleikirnir í Føroyum í 2027 fáa helst føroyskan høvuðsstuðul.

Enski bankin Natwest hevur verið høvuðsstuðul hjá Oyggjaleikunum í 24 ár, men hevur takkað fyri seg, og altjóða oyggjaleikanevndin hevur ilt við at finna nýggjan langtíðarstuðul.

Tí er sannlíkt, at hvørjir einstakir leikir fáa sín egna høvuðsstuðul. 

 - Tað kann gott henda, sigur formaðurin í altjóða Oyggjaleikanevndini, Jörgen Pettersson.

 - Tað er helst eisini lættari hjá vertsoyggjunum at kenna møguligar høvuðsstuðlar, enn at vit skulu hava ein stuðul, sum til dømis hóskar til bæði Føroyar og Bermuda.

Altjóða oyggjaleikanevndin vitjaði í Føroyum um vikuskiftið í samband við, at Oyggjaleikirnir vera í Føroyum um góð trý ár.