Funnu kokain í banankassum í Týsklandi

Starvsfólk í fleiri Lidl-matvøruhandlum í týsku býunum Brandenburg og Berlin hava funnið útivið 100 kilo av kokaini í banankassum.

Kokainið var funnið hósdagin, tá ið vørur skuldu pakkast upp, skrivar týska blaðið BZ.

Boð vóru send eftir politinum, ið skipaði vaktarhald kring handlarnar við hesum stóru nøgdunum av rúsevnum.

Ikki er greitt, hvussu nógvar matvøruhandlar, talan er um, men tað skulu vera minst fýra í Brandenburg og sjey í Berlin.

Hetta er ikki fyrstu ferð, at kokain verður funnið í banankassum. Í september vóru funnin 500 kilo á Brandenburg-leiðini.

Nøgdirnar, sum eru funnar í hesum umfarinum, høvdu havt eitt marknaðarvirði upp á næstan 30 milliónir krónur.