Landsstýrismálanevndin biður um frágreiðingar

Um tríggjar vikur skal Landsstýrismálanevndin hava frágreiðingar frá Dennisi Holm, landsstýrismanni, um svartkjaftabýtið, og frá Landsgrannskoðanini um fíggjarligu støðuna hjá Húsalánsgrunninum.

Landsstýrismálanevndin hevði fund um tvær kærur í gjár.

Umsitingin mælir til at viðgera báðar.

Árni Skaale, tingmaður, hevur kært Dennis Holm, landsstýrismann, um svartkjaftabýtið.

Jacob Vestergaard, tingmaður, hevur kært Ingilín D. Strøm, landsstýriskvinnu.

Hann sigur, at hon segði ósatt fyri tinginum, tá hon segði, at hon ikki hevði fingið ábendingar um, at tað eru trupulleikar við langtíðarhaldførinum hjá Húsalandsgrunninum og Bústøðum.

Tað skal Landsgrannskoðanin hava sagt, at haldførið ikki er í lagi, var sagt í løgtinginum.

Men Hans Jacob Thomsen, formaður í landsstýrismálanevndini, sigur, at í frágreiðingini hjá Landsgrannskoðanini verður einki beinleiðis sagt um haldførið. 

Tí hevur nevndin biðið Landsgrannskoðanina nágreina hetta.