Føroyskt dómarapar í Danmark: Høgni og Andrias eru nú elitudómarar

Teir eru beiggjar, teir eru báðir lesandi, og teir eru nú eisini elitudómarar. Brøðurnir Høgni og Andrias Fríðuson Gaard verða komandi kappingarár elitudómarar í Danmark, skrivar Hondbóltssambandið. Teir gerast tí partur av fremstu dómarum í Danmark, og í fyrstu atløgu skulu teir komandi kappingarár døma í 1. deild.

Elitudómarar í Danmark eru sambært HSF dómarar, sum døma í liga-deildini, sum er besta deildin, og í 1. deild, sum er næstbesta deildin. Eisini eru elitudómarar saman til skeið, testir og samlingar av ymsum slag. 

Høgni og Andrias eru báðir lesandi í Keypmannahavn og hava dømt nógv í 2. deild og nakað í fyrstu deild. Men eftir at hava fingið góð skoðsmál fyri kappingarárið 2023/24, eru teir nú fluttir upp.

Høgni og Andrias døma eisini altjóða fyri Føroyar, har teir hava verið partur av Young Referees Programme hjá EHF. Saman hava teir dømt altjóða kappingar í Svøríki, Montenegro og Ungarn seinastu trý árini.