Sjúkraflutningur: Enn er ov tíðliga at meta um responstíðir í Sandoynni

Enn er ov tíðliga at meta um responstíðina í Sandoynni, tí royndirnar eru so fáar. Men mett verður, at responstíðirnar í Sandoynni vera tær somu sum nógva aðrastaðni í Føroyum.

Tað sigur Margit Stórá, landsstýriskvinna, í svari til Jacob Vestergaard, løgtingsmann, sum spurdi um sjúkraflutningstænastuna í Sandoynni.

Arbeiðsbólkurin, sum skal koma við einari responstíð, er ikki liðugur enn, og enn er bara talan um eina fyribils meting hjá Sjúkrahúsverkinum um responstíðina, har einans verður lagt upp fyri fjarstøðu og ferð. 

Margit Stóra sigur, at av tí at royndirnar eru so fáar, er ov tíðliga at meta um responstíðina í Sandoynni.

Sandoyartunnilin

Sandoyartunnilin.

Sáttmálin farin úr gildi

Sáttmálin um sjúkraflutning millum Sjúkrahúsverkið og ein privatan veitara í Sandoynni fór úr gildi 31. mai, og sjúkraflutningstænastan á Landssjúkrahúsinum hevur nú sjúkraflutningin í Sandoynni. 

Í tilbúgvingarætlanini fyri Sandoyartunnilin er ásett, at um ein vanlukka ger, at ikki er møguligt at flyta sjúklingar út við tunnilsmunnan á Streymoynni, men í staðin Sandoyarmegin, verður tyrla brúkt.

Er tyrla ikki tøk, verður skip brúkt. 

Sambært Sjúkrahúsverkinum arbeiðir Bráðdepilin á Landssjúkrahúsinum við eini ætlan at hava sjúkrabil á Sandi til tunnilstilbúgvingina, sigur Margit Stórá.

Ætlanin er, at bilurin skal mannast við starvsfólki hjá sjúkraflutningstænasuni á Landssjúkrahúsinum, sum í bráðstøðum, og tá ikki er møguligt at brúka tunnilin, verður flutt til Sands við tyrlu.