Alex rakti best á heimabreyt

Alex Johannesen vann føðingardagskappingina í OL-trap, sum var í Leirvík leygardagin. Tað er triðju ferð, at sterki skjúttin vinnur kappingina hjá Eysturskoti á heimabreyt.

Heimamaðurin var javnur við Jonhard Klettheyggj og Jón Jacobsen úr Byrsumúla eftir innleiðandi skjótingina, men í finaluni var Alex Johannesen tryggari og vann við 87 stigum. Trý framman fyri Jonhard Klettheyggj.

 - Sjálvandi hevur tað týdning at vinna kappingarnar. So nógvar, sum mann kann, helst allar, men at vinna tær á heimabana er sjálvandi altíð eitt sindur betri, segði Alex Johannesen, sum skal umboða Føroyar í Nordic Shooting Range saman við feðgunum Jonhardi og Bartali Klettheyggj í august.