Val í Fraklandi: Neyvan nakar avgjørdur meiriluti

Í Fraklandi verður bíðað í stórum spenningi eftir seinna umfari av tjóðartingsvalinum, sum verður í morgin.

Fyrra valumfarið farna sunnudag bleiv ein greiður sigur til høgravíðgongda Rassemblement Nationale (RN), sum fekk 33% av atkvøðunum. Vinstraflokkurin Nouveau Front Populaire (NFP) fekk 28%, og Ensemble, sum er samgongan av flokkum, ið stuðla forsetanum Emmanuel Macron, fekk 20%.

Spenningurin nú snýr seg um, hvørt Rassemblement Nationale eftir seinna valumfarið í morgin kann fáa avgjørdan meiriluta í franska tinginum og harvið skipa stjórn einsamallur. 

Flokkurin við bert 28 ára gamla Jordan Bardella á odda hevur gjørt greitt, at hann ikki er áhugaður í at skipa samgongu við nakran annan flokk, men bara fer at skipa stjórn, um hann fær einsamallan meiriluta.

Ein meiningakanning, sum Ifop almannakunngjørdi mikudagin, bendi á, at veljarar heldur vilja hava eina vinstra-moderata stjórn, sum stuðlar forsetanum Macron, enn eina stjórn við Jordan Bardella sum forsætisráðharra, um valið stendur millum hesar báðar møguleikarnar. Men um valið bara stendur millum eina høgrastjórn ella eina vinstrastjórn, stendur mestsum á jøvnum, vísti kanningin.

Roknað verður við, at Rassemblement Nationale fer at vinna valið, men ikki nóg sannførandi til at fáa 289 tingsessir, sum er krav fyri at fáa einsamallan meiriluta.

Valið og valstríðið hava avdúkað eina stóra polarisering í franska samfelagnum, og mótmælistiltøk hava verið síðan fyrra valumfarið 30. juni. Bretski miðilin The Guardian skrivar, at 30.000 fronsk løgreglufólk eru til reiðar at fara til arbeiðis í morgin, um tað verður brúk fyri teimum.