Altjóða KT-kreppan hevur ikki rakt okkum enn

Altjóða KT-kreppan ávirkar eftir øllum at døma ikki her heima enn.

Um allan heim verður boðað frá trupulleikum við kunningartøkni. Orsøkin er dagføringar hjá Microsoft.

Trupulleikarnir ávirka flogferðslu, miðlar og handlar.

Flogfør í millum annað Avstralia og USA sleppa ikki á flog.

Eisini í Berlin og Amsterdam eru avbjóðingar við flogferðsluni, skrivar danska kringvarpið.

´DR hevur ein lista við floghavnum, sum eru ávirkaðar. Har eru Berlin, Sydney, Keypmannahavn, Dehli, Narita, Prag, Schipol, Edinburg og Swissport.

KT-trupulleikar

KT-trupulleikarnir hava eisini rakt floghavnir. (Mynd: Reuters/Ritzau Scanpix)

Eisini trupulleikar í Kastrup

Nú hevur flogvøllurin í Kastrup eisini fingið trupulleikar.

Sambært danska kringvarpinum hevur floghavnin boðað frá, at ferðafólk noyðast at skriva seg inn sjálvi uttan telduhjálp.

Hetta kann hava við sær, at langar bíðirøðir vera í floghavnini.

SAS upplýsir sambært Reuters tíðindastovuni, at tøkniligir trupulleikar hava við sær, at innskrivingarmotorarnir eru í ólagi.

Flogførini flúgva, sum tey skulu, men roknast kann við seinkingum, sigur eitt talsfólk hjá SAS við DR.

Í  Lu:beck og Kiel í Týsklandi hava sjúkrahús avlýst skurðviðgerðir, og bretska kringvarpið skrivar, at læknar í Onglandi taka sær bert ev teimum sjúklingum, sum eru ógvuliga sjúkir.

Øll onnur verða biðin um at avlýsa sínar avtalur, sigur ein kommunulækni við BBC.

Jóhanna á Bergi

Jóhanna á Bergi, stjóri í Atlantsflogi

Flogferðslan hjá AA ikki ávirkað

Flogferðslan hjá Atlantic Airways er ikki ávirkað enn.

Jóhanna á Bergi, stjóri, sigur, at fyribils eru ongar seinkingar, men tað er ikki óhugsandi, at seinkingar verða, sum dagurin líður.

- Vit fylgja við støðuni, tí seinkingar kunnu koma, av tí at seinkingar eru á teimum farleiðum, vit flúgva til, sigur Jóhanna á Bergi.

Brian Smedemark, rakstrarstjóri í Føroya Banka sigur, at har hava tey einki hoyrt um kt-kreppuna, og hava onga ávaring fingið um, at hon fer at ávirka skipanir hjá bankanum.

Danska kringarpið skrivar, at tilbúgvingin í Keypmannahavn er ávirkað, tí har ber ikki til at taka ímóti automatiskum eldvarnarum.

DSB er eisini ávirkað. Har ber ikki til at keypa ferðaseðlar, ella at kanna ferðsluna.