Macron brúkti 60 mió. kr. meira enn hann hevði á fíggjarkontuni

Franski forsetin, Emmanuel Macron, hevði í fjør meira enn 60 milliónir krónur í halli á forseta-fíggjarkontuni.

Orsøkirnar eru dýrir veitsludøgurðar og leigað flogfør, skrivar Reuters tíðindastovan.

Eitt grannskoðarayvirlit yvir útreiðslurnar hjá forsetanum vísir millum annað, at í fjør vóru meira enn hálvfjórða millión brúktar bert til mat, tá Charles Kongur og Kamilla drotning vitjaðu Macron í fjør.

Á matarlepanum vóru millum annað bláur hummari og franskir ostar.

Veitsludøgurði var í Spegilsskálanum á Versailles slottinum.

Eisini ein døgurði á Louvre fyri indiska forsetanum, Modi, kostaði meira enn 3 milliónir krónur.

Harafturat hava grannskoðararnir viðmerkingar um, at Macron forseti brúkar Airbuss A330 flogfør til uttanlandsferðir.

Tey flogførini kosta útivið 200.000 krónur fyri ferðina.