Vil hava grønlendskt sum einasta mál

Pele Broberg, sum er formaður í grønlendska flokkinum Parti Naleraq, hevur nú lagt uppskot fyri grønlendska tingið Inatsisartut um, at grønlendska málið skal vera tað einasta í umsitingini hjá tinginum.

Tað skrivar grønlendski miðilin Sermitsiaq í dag.

Í løtuni er tað so, at til dømis lógaruppskot og fyrispurningar til landsstýrisfólk í Grønlandi eisini verða týdd til danskt ella simultantulkað. Men tað skal tað ikki í framtíðini, sigur Pele Broberg og vísir til, at í Fólkatinginum verður tosað danskt og í Løgtinginum verður tosað føroyskt.

"Okkara ting skal vera sum hini í tí sonevnda Ríkisfelagsskapinum. Einasta almenna mál í Grønlandi er grønlendska málið, kalaallisut," sigur Pele Broberg og leggur afturat, at Grønland eigur at taka útgangsstøði í sær sjálvum, eins og hini londini í ríkisfelagsskapinum gera.