Alex føroyameistari í ATB-skjóting

Alex Johannesen rakti best, tá føroyameistarakappingin í ATB-skjóting var á breytini hjá Eysturskoti úti á Vík í Leirvík.

Skjúttin úr Eysturskoti vann FM-heitið fimm leirdúgvur framman fyri næstu kappingarneytarnar. Alex Johannesen rakti 92 av 100 dúgvum. Johnhard Klettheyggj og Finn Ludvig úr Byrsumúla raktu báðir 87, og fyrrnevndi vann spennandi umskjótingina og silvurið við einari dúgvu.

Bartal Klettheyggj úr Byrsumúla vann sannførandi í unglingakappingini. Hann rakti 62 dúgvur, meðan Marius Gaardlykke úr Eysturskoti fekk silvur við 50.

Tríggjar aðrar FM-kappingar verða skotnar næstu tíðina. Fyrst á skránni er OL-trap, sum verður á breytini hjá Byrsumúla á Sandvíkum í Havn 24. og 25. august.