- Tíðindi, mentan og ítróttur
Heilsustarvsfólk í India mótmæla
![](https://kvf.fo/sites/default/files/styles/grein-ovasta-mynd/public/india_2.jpg?itok=GV_iwkU8)
Heilsustarvsfólk í India løgdu í gjár arbeiðið niður í samhuga við 31 ára gamla kvinnuliga læknan, sum í síðstu viku bleiv neyðtikin og dripin, tá hon var í starvsvenjing í stórbýnum Kolkata.
Tað skrivar NTB.
31 ára gamli læknin var álopin í einum sovisali. Ein maður, sum arbeiðir á sjúkrahúsinum í Kolkata er handtikin og varðhaldsfongslaður í samband við málið.
Drápið hevur elvt til mótmæli millum heilsustarvsfólk. Málið verður av summum samanborið við eitt annað mál í 2012, tá ein 23 ára lesandi bleiv hópneyðtikin og dripin í einum bussi í høvuðsstaðnum New Delhi.
Læknarnir og kvinnubólkarnir, sum mótmæla, eru óð um, at herdar lógir ikki hava megna at minka vaksandi harðskapin móti kvinnum.
Í 2022 blivu 90 neyðtøkur fráboðaðar dagliga í India, vísa almenn hagtøl.
Indiskir læknar krevja, at stjórnin setir í verk lóg, sum verjir heilsustarvsfólk móti harðskapi.