Hjalti skal hjálpa Peter við hondbóltsmonnunum

Hjalti Mohr Jacobsen er nýggi hjálparvenjarin hjá manslandsliðnum í hondbólti, skrivar Hondbóltssambandið.

Hann loysir av fyri Julian Johansen, sum segði upp eftir HM-undankappingardystirnar ímóti Norðurmakedónia í mai, tí tíðin rakk ikki til starvið. 

Sáttmálin er galdandi fyri komandi EM-undankappingina, sum byrjar í november við dystum ímóti Kosovo og Ukraina, og eitt møguligt endaspæl.

Hjalti Mohr Jacobsen er 38 ára gamal, og hevur spælt hondbólt við Kyndli. Síðan hann gavst at spæla, hevur hann millum annað vant Kyndil og U04-landsliðið saman við Djóna Gaard Joensen, sum hevur verið í trimum endaspølum.

A-landsliðið hjá monnum skal eisini hava nýggjan liðleiðara, tí Jóngerð Nielsen hevur takkað fyri seg eftir fimm árum.