Nótaskipini royna eftir sild

Illveður um vikuskiftið forðaði nótaskipunum í at royna eftir makreli eystan fyri Sandoyarbanka og Nólsoyarbanka, har sum tey fingu nógvan, stóran og góðan makrel í síðstu viku.

Skipini fóru tí norðureftir at royna eftir sild.

Makrelkvotan fyri 2013 er við at vera uppi nú.

Bara nótaskipini, sum hava eginkvotur, hava eitt sindur eftir av makreli.

Í fjør kundu skipini fiska upp í tíggju prosent meira enn eginkvotan hjá teimum var.

Tað, sum so varð ov nógv fiskað í fjør, skuldi takast av eginkvotuni í ár.

Hesin møguleikin er ikki við í kunngerðini, sum er galdandi fyri 2013.

Í fjør varð makrelkvotan ikki fiskað. 30.000 tons lupu av.

Tey vórðu løgd aftur at kvotuni í ár, sum tí gjørdist næstan 144.000 tons.