Watson biður um politiskt friðskjól í Fraklandi

Paul Watson biður nú franska forsetan, Emmanuel Macron, um politiskt friðskjól í Fraklandi. 

Áheitanin um friðskjól var send Macron fyrr í vikuni, skrivar AFP. 

Tað er Sea Shepherd í Fraklandi, sum hevur sent umbønina, váttar leiðarin hjá franska felagsskapinum fyri AFP. 

Paul Watson hevur nú skjótt sitið í varðhaldi í Grønlandi í tríggjar mánaðir. Tað var 21. juli, at hann var handtikin í Nuuk.

Varðhaldsfongslingin er longd fýra ferðir.

Paul Watson og hansara fólk hava fingið loyvi at royna málið í Hægstarætti. Hægstirættur hevur ikki dagfest viðgerðina enn.