Treytaðan dóm og samfelagstænastu fyri blúnisbrot

Ein 58 ára gamal maður fekk fyrrapartin seks mánaða treytaða fongsulsrevsing fyri blúnisbrot.

Hann skal eisini, sambært dóminum hjá Føroya rætti, gera samfelagstænastu í 120 tímar og rinda kvinnunum, sum hann er dømdir fyri at gera seg inn á, endurgjald.

Endurgjaldið er millum 5.000 og 10.000 krónur til hvørja.

Maðurin var ikki sjálvur í rættinum, tá dómurin fall, men verjin hjá honum bað um umhugsanartíð, um dómurin skal skjótast inn fyri Landsrættin.

Viðgerðarstovur í Havn og Klaksvík

Maðurin var ákærdur fyri at hava framt blúnisbrot móti 12 kvinnum, meðan hann gav teimum viðgerðir á sínum viðgerðarstovum í Havn og Klaksvík. 

Maðurin hevur, sambært ákæruritinum, framt hesi brotini frá 2018 til 2021.

Av tí at málini eru so gomul, var dómurin treytaður.

Kravið hjá ákæruvaldinum var átta mánaðir treytaleysir. Maðurin noktaði seg sekan.

Hann var frídømdur í onkrum máli og í teimum førunum, har rætturin ikki helt, at brotini, maðurin var ákærdur fyri, vóru av kynsligum slagi.