Útihýsa ikki møguleikanum fyri herverki á finskan kaðal

Ein samskiftiskaðal millum Finnland og Týskland er slitnaður. Og tað ber ikki til at útihýsa møguleikanum fyri, at talan er um herverk ella sabotasju.

Tað skrivar finski miðilin Ilta-Sanomat nú seinnapartin.

Talan er um sonevnda "C-Lion1" telekaðalin, sum var tikin í nýtslu í 2016. Kaðalin er næstan 1200 kilometrar langur og liggur ikki langt frá Nord Stream-gassleiðingini, sum sprongdist í september í 2022.

Liggur uttan fyri vanliga skipaferðslu

Tað er almenna finska felagið Cinia, sum hevur ábyrgd av kaðalinum, og sambært fyrisitingarstjóranum í Cinia, Ari-Jussi Knaapila, er brekið á kaðalin í svenska búskaparøkinum, umleið miðskeiðis á kaðalinum, sum altso gongur úr Finnlandi til Týsklands.

Cinia-stjórin sigur, at ofta koma brek á ein kaðal sum henda av, at skip kasta akker. Men hesin kaðalin liggur langt frá vanligari skipaferðslu, og tað eru heldur ongar ábendingar um, at brekið er komið av seismiskum virksemi ella omanlopi.

Ein onnur megi uttanífrá hevur elvt til brekið á kaðalin, sigur Ari-Jussi Knaapila sambært norska TV2.