Kinesiskt skip undir illgruna fyri kaðalslit í Eystrasalti

Eitt kinesiskt skip er undir illgruna í sambandi við tvey kaðalslit í Eystrasalti í farnu viku.

Danskir og svenskir miðlar skrivaðu í gjár, at Danmark og onnur lond eru í samráðingum við Kina um at sleppa at kanna skipið Yi Peng 3, sum í løtuni liggur fyri akker í Kattegat, í donsku búskaparsonuni, men uttan fyri danskt løgdømi.

Á tíðindafundi í morgun segði svenski forsætisráðharrin Ulf Kristersson, at Svøríki vil hava skipið í svenskan sjógv.

Yi Peng 3

Bæði danska og svenska verjan hava eyguni eftir kinesiska skipinum. (Mynd: Ritzau Scanpix)

Hann legði dent á, at hvørki Kina ella skipið eru ákærd fyri nakað, men fyri at gera samstarvið lættari, vilja svensku myndugleikarnir fegnir hava skipið inn í svenskan sjógv.

Yi Peng 3 sigldi nær við teir báðar kaðlarnar, tá teir vórðu oyðilagdir. Skipið hevur í meir enn eina viku ligið í Kattegat, har bæði verjan og sjóverjan halda eyga við tí.

Svenska og finska løgreglan kanna kaðalslitini. Annar kaðalin gongur millum Finnland og Týskland, og hin gongur millum Svøríki og Litava.