Nakrar skipasmiðjur skulu undangóðkennast at smíða kalsoyarferjuna

Fíggjarnevndin hjá løgtinginum vil hava at vita, um 20 milliónir krónur eru nóg mikið at fara undir at smíða nýggju kalsoyarferjuna.

Men Strandferðslan fær ikki sagt neyvt, um hetta er nóg mikið.

Hetta sæst í svari frá Strandferðsluni til fíggjarnevndina, sum hevur sett stovninum fleiri spurningar í sambandi við fíggjarlógarviðgerðina.

Strandferðslan sigur, at kostnaðurin fyri skipið er í løtuni mettur til 170 mió.kr. 

Niels Juel Arge og Mouritz Mohr, nýggj kalsoyarferja, Strandferðslan, Mest

Niels Juel Arge, strandferðslustjóri, og Mouritz Mohr, stjóri í Mest, tá skrivað var undir sáttmálan um at projektera ferjuna. 

Projekteringin um at vera liðug

- Prosjekteringin hevur verið í gongd  alt hetta árið, og er nú at kalla liðug. Fyrst í komandi ári verður farið at finna 5-6 skipasmiðjur, sum skulu undangóðkennast, áðrenn tær verða mettar egnaðar til at bjóða upp á byggingina. Tá ið byggisáttmáli er undirskrivaður, kann verða farið í gongd við at strekkja kjølin, sigur Strandferðslan í svarinum.

Strandferðslan sigur, at tað er ikki óvanligt í samband við skipabygging, at fyrsta ratan fellur til gjaldingar við sáttmálaundirskrift og onnur ratan, tá skrokkurin verður strektur.

Verður byggisáttmáli undirskrivaður við skipasmiðju um heystið, skal fyrsta ratan gjaldast tá, t.e. í 2025.

Støddin á fyrstu ratu kann vera ymisk. Tað kann bæði vera 10 prosent, 15 prosent ella 20 prosent av sáttmálaupphæddini, sigur Strandferðslan í svarinum til fíggjarnevndina.