21KNM: - Bókið okkum meðan vit enn eru bíligir

21KNM er føroyskur hipphopp-bólkur, sum var settur á stovn á sumri í fjør.

Hóast teir ikki hava verið virknir leingi, eru longu fleiri hitt gjørd.

Fangandi sangir sum MAT Í LUUX, Bowla í Leirvík og Effo Date hava verið væl fagnaðir.

Tann seinasti í røðini eitur Camping, og har samstarva ungu harrarnir við ongan minni enn Árna Andreasen.

Alt byrjaði í einum slavnum kamari við einari mikrofon. Nú eru umstøðurnar blivnar betri, og tað er enn sum áður Hans Oluf Johannesen, ið er framleiðari.

Rappararnir eru Jens Eli Ellefsen Ólason, Petur Fjallsbak, Brandur Reynstind.

21KNM hevur nógv nýtt tilfar, sum kemur út í 2025. Tað gleða vit okkum til, og nú bíða vit bara eftir, at festivalarnir fara at ringja, tí vit elska at vera á pallinum, siga teir við einum smíli.