Grønlendskt pass: Hvør er grønlendingur?

Fleiri grønlendskir politikarar fegnaðust, tá tað herfyri var greitt, at grønlendskur samleiki nú kann standa í passinum á sama hátt sum danskur samleiki.

Landstingslimurin, Kuno Fencker, sum umboðar Siumut, mælir tó til at vera varin, tá ið avgerð skal takast um, hvør kann sleppa at brúka grønlendskan samleika í passinum.

Verður hetta handfarið skeivt, kann hetta vera vandamikið, ávarar hann.

Ein og hvør er ikki grønlendskur

Kuno Fencker sigur í politiska miðlinum, Altinget, at tað er umráðandi, at heitið "grønlendskur" í passinum ikki verður nakað, sum ein og hvør kann fáa sær, uttan at hava nakað veruligt samband við Grønland.

"Um vit ikki greitt allýsa, hvør kann fáa grønlendskt pass, er vandi fyri, at vit missa takið á okkara tjóðskaparliga samleika," sigur hann í Altinget.

Kuno Fencker finst eisini at, at avgerðin um at loyva grønlendska samleikanum at standa í passinum, er tikin uttan um Landstingið, sum er valt til at taka sær av Grønlandi og grønlendska fólkinum.

Hann heitir á grønlendska landsstýrið og Landstingið um at brúka hetta høvið til at allýsa, hvør kann metast at vera grønlendingur, bæði løgfrøðiliga og mentanarliga.