Nakrir skaðar í vindinum

Nakrir skaðar hava verið í vindinum í nátt og fyrrapartin

Í Kaldbaksbotni fóru nakrar takplátur á einum fjósi, í Skálafirði fóru nakrar takplátur á einum neysti, í Fuglafirði er onkur takpláta loysnað, og eitt takvindeyga á einum neysti er farið

Á Glyvrum og í Søldarfirði loysnaðu eisini nakrar takplátur, ið fuku í vindinum, og á Eiði loysnaði ein takpláta á einum sethúsi.

Í morgun var omanlop í Sandslíð.

Ein stórur steinur á 3-4 tons kom á vegin. Vanligir bilar kundu koyra framvið grótinum, men ikki stór akfør. Vegurin var tó skjótt ruddaður av Landsverki.

Flestu bussarnir hjá Strandferðsluni koyra framvegis ikki fyri veður. Teistin hevur ikki siglt, og Smyril hevur eisini avlýst tveir túrar í morgun.

Sí meiri frá Strandferðsluni her.