Stór akfør verða ikki longur sýnað í Klaksvík og á Sandi

Stór akfør, tað vil siga lastbilar, bussar og trailarar, verða ikki longur sýnað í Klaksvík og á Sandi.

Sýningin av hesum akførunum verður í staðin miðsavnað í Saltangará, á Tvøroyri, í Sørvági og í Havn. Hetta er fyri at tryggja, at sýnini eru einsháttað, boðar Akstovan frá.

Øll akfør yvir 3.500 kg verða tí sýnað á nevndu fýra støðum. Broytingin kemur í gildi 27. februar.

Akstovan skrivar, at neyðugt er at tryggja, at sýnini eru eins á øllum sýnsstøðum. At sýna stór akfør krevur serligan kanningarútbúnað, sum árliga skal góðkennast av tøkniligum eftirlitismyndugleikum.

Í Saltangará, á Tvøroyri, í Sørvági og í Havn er góðkendur kanningarútbúnaður til stór akfør.

Akstovan skrivar, at broytingin hevur ikki við sær uppsagnir av starvsfólki.