Kryolitnámið: Grønlendskir floksleiðarar vilja hava málið kannað

Grønlendskir floksleiðarar krevja, at kanningar verða settar í verk eftir dokumentarsendingina í danska kringvarpinum í gjárkvøldið kryolitnámið í Ivittuut.

Sambært sendingini høvdu Danmark og USA 800 milliardir kr. í umsetningini av tí, sum námið gav. 

Erik Jensen, formaður í Siumut, sigur við Sermitsiaq, at hann er illa við av, at danska stjórnin hevur forvunnið so nógvan pening í Grønlandi.

Erik Jensen sigur, at hann fer at krevja, at øll nám og øki, sum verða brúkt til hernaðarendamál, verða kannað, so greiði fæst á, hvussu nógv aðrar tjóðir hava forvunnið.

- Sannleikin má koma fram, sigur hann.

Sí sendingina "Grønlands hvide guld" her

Krevur opinleika

Formaðurin í Attasut, Aqqalu C. Jerimiassen, krevur eisini fullan opinleika í málinum. 

- Hetta kann á ongan hátt góðtakast. Øll slík mál eiga at verða kannað, sigur Aqqalu C. Jerimiassen við Sermitsiaq, og heitir á donsku stjórnina um at taka ábyrgd.

Pele Broberg

Pele Broberg er formaður í Naleraq.

Naleraq: Hetta hava vit vitað

Pele Broberg, formaður í Naleraq, sigur hinvegin, at neyðugt er ikki at kanna meiri. Hann heldur, at spurningurin er, hvussu veljarin skal brúka vitanina. 

- Alt, sum vit hava sagt, verður váttað nú. Okkum nýtist ikki at líta aftureftir. Vit hava longu vitað tað, sigur Pele Broberg við Sermitsiaq.

- Okkum nýtitst ikki at argumentera fyri, at vit vilja vera sjálvstøðugt land, sigur hann.