Grót kann detta á vegirnar í nýggjum bergholum

Grót kann eisini detta á vegirnar í nýggjum bergholum.

Tað ber ikki til at tryggja seg móti tí hundrað prosent.

Landsverk hevur eftirlit í bergholunum fimta hvørt ár. Tá verða loft og veggir kannað fyri leyst grót, rivur og møguligar lekar. 

Ábøtur verða gjørdar so hvørt eftir tørvi. 

Tað sigur Dennis Holm, landsstýrimaður, í svari til Jóhannis Joensen, løgtingsmann.

Ikki tryggjaðir við betongi

Meginparturin av bergholunum er ikki tryggjaður við betongi, tí tilfarið í fjallinum er so mikið gott.

Landsverk fær viðhvørt skaðafráboðanir frá bileigarum, sum hava koyrt á grót í bergholunum. 

Hagtøl vera ikki gjørd um hesar fráboðanir. Vanliga er hetta eitt mál millum bileigaran og tryggingina.

Ikki gjørd til gongufólk

Dennis Holm svarar eisini, at loyvt er at ganga í bergholunum. 

Men tey eru ikki gjørd til fólk til gongu ella á súkklu, til ábæra ferðslu. 

Dennis Holm sigur, at hann hevur heitt á Landsverk um at kanna, hvussu ábær ferðsla kann skipast í bergholunum.

Landsverk varðar av 21 bergholum, sum eru tilsamans 40 kilometrar.