Landsstýriskvinnan fingið álit um landslæknaembætið

Samgonguflokkarnir ætla at yvirtaka landslæknaembætið, og støða verður tikin til málið í vár, sigur Súsanna Bertholdsen, landsstýriskvinna

Súsanna Bertholdsen, landsstýriskvinna, hevur fingið álit frá arbeiðsbólki, sum var settur at kanna møguleikarnar at yvirtaka landslæknaembætið.

Tordis Vang Guttesen

28.02.2025 - 13:22

Álit um at yvirtaka uppgávurnar hjá landslæknaembætinum er handað Súsonnu Bertholdsen, landsstýriskvinnu í heilsumálum.

Hon skal nú taka støðu til, um landslæknaembætið og ávís onnur málsøki skulu yvirtakast í hesum samgonguskeiðnum.

Umframt uppgávurnar hjá landslæknaembætinum vísir arbeiðsbólkurin á møguleikar at yvirtaka málsøkini sjúklingarættindi, tvingsil í psykiatri, tvingsil í somatikk, rúsandi evni, vísindasiðseminevnd og kæru- og endurgjaldsmøguleikar.

Les álitið her.

Í mars í fjør setti táverandi landsstýriskvinnan í heilsumálum, Margit Stórá, ein arbeiðsbólk við umboðum fyri føroyskar og danskar myndugleikar at útgreina og lýsa møguliga yvirtøku av landslæknaembætinum.

Í samgonguskjalinum millum Javnaðarflokkin, Tjóðveldi og Framsókn stendur, at yvirtøkan skal fyrireikast, og sambært Súsonnu Bertholdsen, verður støða tikin til málið í vár.