Fuglafrøðifelagið mælir frá at skjóta grágás

Føroya Fuglafrøðifelag mælir staðiliga frá, at loyvi verður givið til at skjóta grágás. Tað sigur felagið í einum hoyringarsvari til Fiskimálaráðnum, ið er myndugleiki á økijum. Sambært fuglafrøðifelagnum eru enn eingi vísindalig prógv fyri, at grágásin elvir til týðandi fíggjarligan miss hjá bøndrum.

Út um mark

- Tað er út um alt mark, at almennu Føroyar ætla at geva loyvi at avmarka ein fuglastovn uttan at vitam hvussu stórur stovnurin er, og uttan at kenna til ferðing og annað hjá hesum fuglastovni.

Aðrastaðni, har loyvi verða givin at avmarka grágásastovnar, eru regluligar teljingar ein týðandi partur av loyvisgrundarlagnum, sigur felagið í sínum hoyringarsvari, og ger vart við, at tað eru nógvir aðrir møguleikar at styggja grágás enn at skjóta.

Búnaðarstovan hevur heitt á landsstýrið um at loyva veiðu av grágás aftur í Føroyum á veltum lendi.