Smyril Line hevði 140 milliónir í avlopi fyri skatt

Smyril Line hevði 140 milliónir krónur í avlopi fyri skatt í 2024. Úrslitið eftir skatt er 127 milliónur krónur.

Tað stendur at lesa í roknskapinum hjá felagnum, sum er almannakunngjørdur í dag.

Ársúrslitið er slakar fimm milliónir krónur frægari enn í fjør, tá 122 milliónir krónur lógu eftir á botnlinjuni.

Umsetningurin hjá reiðarínum í fjør var 1,455 milliardir krónur, sum er átta milliónir krónur minni enn árið frammanundan. 

Hetta verður tó uppvigað við lægri konstaði, og tí hevur felagið eitt betri rakstarúrslit enn árið frammanundan.

Felagið rindaði í fjør góðar 262 milliónir krónur í lønum og tað eru 16 milliónir meira enn í 2023.

Smyril Line hevur ognir fyri góðar 1,8 milliardir krónur, men tað eru útlit til, at hesi tøl fara at hækka næstu árini. 

Felagið er nevniliga í holt við at byggja tvey nýggj farmaskip í Kina, sum eftir ætlan koma í flotan miðskeiðis næsta ár. Eisini er felagið í holt við at byggja eitt nýtt høvuðssæti, sum eisini verður nýggj farstøð og nýtt goymsluhús á havnarlagnum í Tórshavn.

Eginognin hjá Smyril Line var 680 milliónir krónur við árslok í fjør.