Skulu svara semingsuppskoti fyrrapartin

Heilsuhjálparafelagið og Kommunala arbeiðsgevarafelagið fingu um 11-tíðina í gjárkvøldið semingsuppskot, sum tey skulu svara nú fyrrapartin kl. 11.

Tað váttar Terje Sigurðsson, semingsmaður.

Semingsroyndin byrjaði fyrrapartin í gjár og helt á til kl. 11 í gjárkvøldið, tá Semingsstovnurin kom við semingsuppskoti.

Ber semingsroyndin ikki á mál, fara limirnir í Heilsuhjálparafelagnum í verkfall.

Tað var avgjørt á aðalfundi hjá Heilsuhjálparafelagnum leygardagin.

Nevndin í Heilsuhjálparafelagnum legði uppskot fyri aðalfundin um, at nevndin skuldi fáa heimild at lýsa arbeiðssteðg, um semingsroyndin ikki ber á mál.

Og hetta var samtykt við stórum meiriluta.

Sáttmálin hjá Heilsuhjálparfelagnum fór úr gildi 1. oktober í fjør, men arbeitt verður eftir honum, til nýggjur sáttmáli er gjørdur.