Hava biðið um 25-30 milliónir aftrat til Dalstunnilin

Dalstunnilin kann vera liðugur at taka í nýtslu longu í ár. Men til tess krevst ein eykajáttan frá løgtinginum.

Tað sigur Sigurð Ó. Vang, leiðari á Verkætlanardeildini hjá Landsverki, við Dimmalætting.

Sigurð Ó. Vang sigur við Dimmalætting, at tað mangla einar 25-30 milliónir krónur í fyri at gera Dalstunnilin lidnan, og hesar pengar hevur Landsverk biðið landsstýrið um at játta við eini eykajáttan.

Byrjaði í 2021

Arbeiðið at gera tunnilin til Dals byrjaði í 2021, og bergholið varð skotið ígjøgnum í november 2023.

Tunnilsliðið hjá Landsverki ger tunnilin, sum er 2,2 kilometrar langur. Arbeiðið er nakað seinkað, bæði av manglandi játtan og tí at nøkur av arbeiðsfólkunum valdu at siga upp.

Tí hevur higartil verið roknað við, at tunnilin verður liðugur í 2026.

180 milliónir

Men við eini eykajáttan á 25-30 milliónir kann arbeiðið sum nevnt gerast liðugt í ár, metir Landsverk.

Sigurð Ó. Vang sigur við Dimmalætting, at Dalstunnilin væntandi fer at kosta umleið 180 milliónir krónur.