Nýggi stjórin: Meiri talgilding í KvF og starvsfólk førleikamennast

- Kringvarpið skal gera meira á talgilda økinum, og starvsfólkini skulu førleikamennast.

Tað sigur Magnus Dam, nýggi kringvarpsstjórin, sum tekur við starvinum 1. mai.

Magnus Dam er útbúgvin journalistur frá Danmarks Journalisthøjskole og løgfrøðingur frá Københavns Universitet. 

Hann starvaðist sum løgfrøðiligur ráðgevi í Løgdeildini hjá Tórshavnar Kommunu frá 2007 til 2018, og síðani 2018 hevur hann verið deildarleiðari á Stjórnarskrivstovuni í kommununi

Hann arbeiddi sum journalistur á Sosialinum og í Kringvarpinum frá 2000 til 2006.

Starvið er áramálssett í 5 ár.

Katrin Petersen, sum síðani desember í fjør hevur verið virkandi kringvarpsstjóri, fer aftur í starvið sum deildarleiðari fyri Aktuelt.