Klaksvíkar kommuna í stórari skuld

Góðar 391 milliónir krónur. Hetta er skuldin hjá Klaksvíkar kommunu við støði í seinastu uppgerðini, sum var 31. desember í 2024.

- Skuldin kemst av íløgunum, sum skulu byggja býin út, sigur Karl Johansen, borgarstjóri í Klaksvíkar kommunu. 

Ein av stóru íløgunum er útstykkingin á Fossum, sum í løtuni hevur 21 byggiklár grundstykkir til sethús og 13 byggiklár grundstykkir til raðhús, og eftir upprunaligu ætlanini er talan um til samans 91 grundstykkir. Prísurin á útstykkingini er góðar 100 milliónir krónur.

Ein onnur kostnaðarmikil íløga hjá kommununi er nýggja ítróttarøkið við Djúpumýru, sum hevur kostað kommununi 100 milliónir krónur.

Afturat hesum eru 50 milliónir krónur brúktar upp á ídnaðarøkið við Borðoyarvík.

Hóast hesar íløgur hava verið kostnaðarmiklar, hevur býráðið gjørt av, at ikki steðga verkætlanunum, men nú skal tamarhald fáast á skuldini, sigur Karl Johansen, borgarstjóri.

Les eisini: Klaksvíkar kommuna er ikki so illa fyri sum støðan bendir á