Rættarmál: Pinkubarn var í lívsvanda við skallabroti og heilabløðingum

Føroya rættur fer í næstu viku at viðgera eitt mál um serliga grovan harðskap móti pinkubarni.

Ein 26 ára gamal maður er ákærdur fyri harðskap móti soni sínum.

Tað var, sambært ákæruritinum, 23. oktober í 2023.

Skallabrot og heilabløðingar

Harðskapurin var so grovur, at drongurin, sum er føddur í juli 2023, var í lívsvanda.

Hann fekk skallabrot og heilabløðingar og aðrar bløðingar í høvdinum.

Vandi var fyri varandi meini.

Kvinna ikki ákærd

Maðurin og ein kvinna vóru varðhaldsfongslað, skuldsett fyri hendingina, 25. oktober 2023.

Kvinnan var latin leys í januar 2024 og maðurin í februar 2024.

Málið var viðgjørt fyri dupultum afturlatnum hurðum í Føroya rætti, so lítið og einki fekst at vita um tað.

Kvinnan verður ikki ákærd, men maðurin er ákærdur eftir grein 246 í revsilógini, sum er um grovasta harðskapin.

Fongsul upp í 10 ár

Tann greinin sigur, at hevur harðskapurin við sær annans deyð, ella er hann í aðramáta so grovur, ella hevur so álvarsaman skaða við sær, at talan er um serliga skerpandi umstøður, kann revsingin vaksa til fongsul upp í 10 ár.

Sambært ákæruritinum er talan um serstakliga tyngjandi umstøður.

Fyrivarni er tikið um krav um endurgjald.

Maðurin noktar seg sekan í ákæruni.