Handtikin fyri valsvik í Belgia

Belgiska løgreglan hevur handtikið sjey fólk, sum eru undir illgruna fyri at hava skipað fyri valsviki í býnum Ninove, har ein politikari ytst á høgravonginum vann lokalvalið.

Guy D'haeseleer í politiska flokkinum ytst á høgravonginum, 'Flamsk áhugamál', stytt VB, var valdur til borgarstjóra í oktober í fjør, men valstýrið fekk illgruna um, at alt ruggaði ikki rætt.

Løgreglan hevur kannað málið og hevur nú handtikið sjey fólk, sum eru undir illgruna fyri at hava nýtt falsaðar fulltrúir og sjúkrameldingar, skrivar tíðindastovan Belga.

D'haeseleer er ikki millum teirra, sum eru handtikin, og hann vísir aftur, at hann á órættan hátt er valdur.

Ninove er har eysturi Flandern, umleið 30 km. vestan fyri Brússel. Umleið 40.000 fólk búgva í Ninove.