G! festivalurin hevur fingið trygdarloyvi

- Øll stór tiltøk skulu hava eitt trygdarloyvi frá løgregluni, sum er evsti myndugleiki, sigur Jan Poulsen, økisleiðari í Norðoyggjum, sum gav G! festivalinum trygdarloyvi í gjár. 

"Vit seta alt upp og gera klárt - og so kemur politisturin at hyggja", fortelur Krístfríð Tyril, samskipari á G! festivalinum. 

G! festivalurin hevur ábygd av trygdini. Tað ber millum annað í sær, at tey skulu hava eina trygdarætlan. Løgreglan er kortini evsti myndugleiki, og hevur tí eftirlit við bæði umstøðum og trygdini á økinum. 

Bleiv eitt sindur vandamikið í 2005 

- Tá Europe var her, tá bleiv tað eitt lítið sindur vandamikið eina løtu, fortelur Kristfríð Tyril, sum hevur verið partur av festivalinum, síðani hann byrjaði í 2002.

Pláss er fyri umleið 5000 á Gøtusandi, men tá Europe spældi í 2005, varð mett at áleið 10.000 fólk vóru til staðar. Tað vóru ov nógv, ásannar G! samskiparin. 

Festivalurin var so nýggjur tá - og Europe var eitt so stórt navn, sigur Kristfríð Tyril um konsertina í 2005.  Hon leggur aftrat, at tann støðan ikki kemur at henda aftur, tí nú verða ikki seld fleiri enn 5000 atgongumerkir. 

Trygdin er í lagi 

"Tey hava havt hann so nógv ár nú. Økið er tað sama - og alt er líka. Tað hevur gingið gott higartil og tað ger tað framvegis", sigur Jan Poulsen, økisleiðari í Norðoyggjum. 

Meira um festivaltrygd verður í Degi og viku í annaðkvøld kl. 19.