Zelenskyj vil hava semju um sjey til tíggju dagar

Ukrainski forsetin, Volodymyr Zelenskyj, vil hava semju um trygd fyri friði innan sjey til tíggju dagar, sigur hann sambært Reuters tíðindastovuni.

Møguligar samrøður við russiska forsetan, Vladimir Putin, kunnu vera í Sveis, Eysturríki ella Turkalandi, sigur Zelenskyj.

Ungarn hevur boðið seg til at vera vertur fyri møguligum friðarsamráðingum.

Spurdur, um friðarsamráðingar kundu verið í Budapest, svara Zelenskyj, at tað hevði verið ógvuliga avbjóðandi, sum støðan er í løtuni.

Zelenskyj sigur, at hann hevur biðið amerikanska forsetan, Donald Trump, leggja trýst á Ungarn, um at gevast við at forða Ukraina at samráðast um limaskap í ES, skrivar NTB.

Viktor Orbán

Viktor Orban. (Mynd: Reuters/Ritzau Scanpix)

Ungarn vil vera vertur

Ungarn hevur boðið sær til at vera vertur fyri møguligum friðarsamráðingum millum Russland og Ukraina, upplýsir ungarski uttanríkismálaráðharrin, Peter Szijjarto, sambært Reuters tíðindastovuni í morgun.

Longu týsdagin gjørdist greitt, at Donald Trump og ungarski forsætisráðharrin, Viktor Orban, hava umrøtt, at Budapest møguliga kundi vera vertur fyri slíkum fundi.

Orban er væl við bæði Trump og Putin.

Putin skal hava sagt Donaldi Trump, at hann heldur vil hava fund við ukrainska forsetan, Volodymyr Zelenskyj, í russiska høvuðsstaðnum, Moskva. Franski forsetin, Emmanuel Macron, vísir á Genève í Sveis, skrivar miðilin, Politico.