Virðið á Ørsted-fyritøkuni er fallið 15 prosent

Virðið á danska felagnum Ørsted er fallið 15 prosent, eftir at felagið fyribils ikki sleppur at byggja havvindmyllulund í USA. 

Tað var um vikuskiftið, at amerikansku myndugleikarnir komu við boðunum, at havvindmyllulundin RevolutionWind í USA skal ikki gerast.

Hetta hevur fingið virðið í Ørsted at falla meira enn 15 prosent.

Danska kringvarpið skrivar, at fleiri greinarar meta, at tað kann fara at kosta felagnum fleiri milliardir krónur. 

Til samanberingar mátti norska Equinor rinda eina eykarokning upp á umleið 5,1 milliard krónur, tá ið amerikanska verkætlanin hjá felagnum, Empire Wind, steðgaði upp herfyri.   

60 mia. aftrat

Ørsted hevur áður biðið íleggjarnar um 60 miliardir kr. aftrat, sum millum annað skuldu nýtast til at gera amerikansku havvindmyllulundina lidna. Ørsted sigur í morgun, at farið verður víðari við tí ætlanini. 

Danski staturin eigur beint yvir 50 prosent av partabrøvunum í Ørsted. Fráboðan er komin um, at staturin fer at seta fleiri pengar í felagið, so at staturin eisini í framtíðini fer at eiga meira enn helvtina á partabrøvunum í felagnum.

Tað merkir, at danski staturin er til reiðar at seta 30 milliardir í Ørsted, skrivar DR.