Upp á tíðina at fáa nýggja javnstøðulóg

- Tað er upp á tíðina, at vit fáa eina nýggja javnstøðulóg.

Tað sigur Halla Nolsøe Poulsen, forkvinna í Javnstøðunevndini, sum var í Breddanum fyrrapartin.

Í juni legði landsstýrið fram støðulýsingina “Saman um javnstøðu.”

Hon vísir, at vit í Føroyum enn hava stórar avbjóðingar, m.a. at kvinnur forvinna minni enn menn, arbeiðsmarknaðurin er ov kynsbýttur, og so hava vit enn tann trupulleika, at tað eru 2.200 kvinnur færri enn menn í landinum.

Men nú sigur landsstýrið, at javnstøðulógin frá 1994 verður endurskoðað, og tað er eitt gott hugskot, sigur Halla Nolsøe Poulsen, forkvinna í Javnstøðunevndini.

Í fleiri áratíggju hava verið 2.000 færri kvinnur enn menn í Føroyum, og tann trupulleikin stendur við. 

Eirikur í Jákupsstovu, landsstýrismaður í almannamálum, sigur, at vit eiga at taka trupulleikan í álvara, at kvinnur ikki støðast í Føroyum.

Hoyr innslag í útvarpstíðindunum: 

Umframt Hallu Nolsøe Poulsen og Eirik í Jákupsstovu var Sirið Stenberg, landsstýriskvinna í uttanríkis- og vinnumálum, í Breddanum fyrrapartin.

Hoyr allan Breddan her.