Skulu skjóta um føroyameistaraheitini

Komandi vikuskifti fara FM-kappingarnar í leirdúgvuskjóting av bakkastokki.

Byrjað verður leygardagin 30. august við FM í OL trap og OL skeet. Fyrri dagurin í OL skeet verður avgreiddur á skjótibreytini hjá Sunda Byrsufelag við Norðskála, og sunnudagurin verður skotið á skjótibreytini hjá Veiðifelagnum Byrsumúla, á Sandvíkum í Tórshavn.

Báðir dagarnir í OL trap verða á breytini á Sandvíkum í Tórshavn, skrivar Skjótisamband Føroya.

Seinasta FM kappingin í ár, verður úti á Vík í Leirvík leygardagin tann 6. september, har FM vinnarin í Nordisk Trap skal finnast

Longu nú er greitt, at vit skulu hava ein nýggjan FM vinnara í OL skeet, tí Marius F. Joensen sum bleiv FM vinnari í fjør, fær ikki luttikið í ár.

Í OL trap skal Esmar Joensen royna at verja meistaraheitið, sum hann óvæntað vann í fjør, og í Nordisk Trap, sum fyrstu ferð bleiv skipað fyri FM í fjør, skal Alex Johannesen royna at endurvinna tað meistaraheitið.