Nú eru vit 55.146 fólk í Føroyum

Ongantíð hava tað búð so nógv fólk í Føroyum sum nú.

Tá Hagstovan var liðug við uppgerðina stóð 55.146 á niðastu linju, og so nógv fólk hava ongantíð fyrr búð í Føroyum.

Men hóast tølini eru bjørt, so er alt kortini ikki so ljósareytt, heldur formaðurin í Búskaparráðnum, sum vísir á, at hesi seinastu fýra árini, tey seinastu fýra 12 mánaðarskeiðini, hava vit eina samlaða nettofráflyting uppá 600 fólk, sum annars hava tilknýti til Føroyar.

- Tað sum mann kann stúra fyri er, at hetta líkasum er ein afturvendan til hetta her, Exit Føroyar, sum vit tosaðu so nógv um fyri tíggju árum síðan, sigur Johnny í  Grótinum, búskaparfrøðingur, sum eisini er formaður í Búskaparráðnum.

Meðan føroyingar - serliga yngri - fara av landinum, ivaleyst í lestrarørindum, so koma fleiri útlendingar hendavegin. Tað sæst týðiliga hetta seinasta 12 mánaða skeiðið, og tað er ivaleyst trýsti arbeiðsmarknaðurin, sum hálar fólk til, tí útboðið av arbeiðsmegi ikki er til tað nógva virksemið, sum er í landinum, sigur Johnny í Grótinum.

Formaðurin í Búskaparráðnum sigur, at tað serliga eru ferðavinnan og framleiðsluvinnan, sum draga útlendska arbeiðsmegi til Føroya í løtuni.

Trýst á leinkið niðanfyri og hoyr alt innslagið, sum var í tíðindunum klokkan 18.00: