Fyrsti løgmaður í heimastýrinum: Eilif varðveitti bøkur hjá Føringatíðindum

Eftir jólafundin í 1888 varð Føringafelag stovnað á fundi í Havn, og mong fólk fylktust í felagnum til tess at fáa føroyingar at ganga fram í øllum lutum.

Føringafelag fór í 1890 at geva út blaðið Føringatíðindi, og har skiftust Rasmus Effersøe, Andras Samuelsen og Jóannes Patursson um at vera blaðstjórar.

Tann síðsti, sum hevði yvirlitið yvir haldarar og roknskapir hjá Føringatíðindum um hendi, var Andras Samuelsen. Yvirlitið yvir haldarar er skrivað í bók fyri seg, og roknskapirnir eru førdir í aðra bók.

Bøkurnar lógu í kjallaranum hjá abbanum

Hesar báðar bøkurnar kom abbasonur Andras, Eilif Samuelsen, framá í kjallaranum hjá abbanum í Fuglafirði, meðan Andras framvegis var á lívi.

Eilif gjørdi abban varugan við, at hetta vóru bøkur, sum máttu varðveitast, og øll árini, síðan Andras Samuelsen doyði í 1954, hevur Eilif Samuelsen havt bøkurnar um hendi.

Bókin yvir haldarar lýsir væl, hvørji fólk vóru virkin í Føringafelag í 1890'unum. Í henni sæst, at fólk kring alt landið hildu Føringatíðindi, og fleiri vóru eisini, sum hildu blaðið í Danmark, eitt nú V. U. Hammershaimb.

Sí innslag við Eilifi Samuelsen og bókunum hjá Føringatíðindum:

Stríð um staviháttin

Jakob Jacobsen var eisini haldari og samskifti við Andras Samuelsen um haldaragjøld.

Í bókini sæst eisini, at Jóannes Patursson gavst at halda Føringatíðindi í 1896. Orsøkin var eitt stríð í felagnum um, hvussu føroyskt skuldi stavast.

Jóannes limaði seg heilt úr Føringafelag, men kom seinni innaftur.

Hetta kemur alt fram í útvarpssendirøðini ”Fyrsti løgmaður í heimastýrinum” um Andras Samuelsen, sum Uni Arge hevur skrivað og lagt til rættis, og Rúni Eysturlíð setti saman. Røðin er í trimum pørtum.

Fyrsti løgmaður í heimastýrinum, Andras Samuelsen

Hvat: Fyrsti løgmaður í heimastýrinum
Hvar: Í útvarpinum 
Nær: Týsdagin kl. 17.05