Vil hava lækna í stjórasessin

Læknafelagið átalar, at lýst var eftir stjóra í Heilsustýrinum uttan nakað krav um, at stjórin er lækni.

Útlit eru tí til, at nýggi stjórin ikki verður lækni og Heilsustýrið verður uttan læknaliga leiðslu.

Tí har var bara ein lækni, stjórin. Og hann er givin.

Tað er ein óneyðugur váði fyri sjúklingatrygd og álitið á avgerðir hjá myndugleikanum, at eingin lækni er í Heilsustýrinum, sigur Læknafelagið.

Felagið vísti Heilsumálaráðnum á hetta 9. oktober. 

Starvslýsingin var ikki broytt.

Freistin at søkja stjórastarvið var 15. oktober. 

Læknar í øðrum londum

Læknafelag sigur, at í Danmark, Noregi, Svøríki og Íslandi eru stjórarnir í heilsustýrunum læknar. 

Og ikki uttan orsøk. 

Læknar hava besta innlit í heilsuverkið og kunnu bera ábyrgd og taka avgerðir um heilsufaklig viðurskifti fyri alt samfelagið.

Heilsustýrið umsitur eisini farsóttarlógina. Slík handfaring krevur læknaliga meting og ábyrgd, millum annað í samband við smittusporing, ráðgeving og raðfestingar, sigur Læknafelagið.

Heilsumálaráðið fekk 12 umsóknir til stjórastarvið í Heilsustýrinum.