BBC biður Trump um umbering

BBC biður amerikanska forsetan, Donald Trump, um umbering, men heldur, at grundarlag er ikki fyri at krevja endurgjald.

BBC hevur ongar ætlanir um at senda umstríddu sendingina aftur, siga tey í eini fráboðan.

Trump hevur boðað frá, at hann fer at stevna BBC, og at hann fer at krevja eina milliard dollarar, eftir at tað kom fram, at BBC villleiðandi hevði klipt eina røðu, sum Trump helt í sambandi við álopið á kongressina 6. januar 2021.

Sendingin hevur longu fingið avleiðingar, tí bæði forstjórin og tíðindastjórin í BBC eru farin úr starvi.