Uppskotið um Suðuroyartunnil lagt fram uttan breiðan, politiskan stuðul

Kringvarpið hevur fingið váttað, at P/f Suðuroyartunnilin, sum ætlandi skal gera og reka undirsjóvartunnil til Suðuroyar, nú arbeiðir við eini triðju linjuføring Sandoyarmegin.

Kringvarpið visti longu um vikuskiftið um hesa triðju linjuføringina. 

Eftir tí, sum Kringvarpið tá hevði skilt, so inniber linjuføringin, at vegur verður gjørdur eystanfyri Sandsvatn, og at tunnil verður gjørdur gjøgnum Sandslíð, tvífalt so langur sum frammanundan er skotið upp, og at innkoyringin til sjálvan Suðuroyartunnilin verður í Djúpadali.

Henda triðja linjuføringin er løgd fram fyri politiska fylgibólkinum í seinastu viku. Men, sum Kringvarpið skilur, so eru flokkarnir ikki bidnir um at taka støðu til hetta triðja uppskotið.

Lagt fram í morgin

Aksel V. Johannesen, løgmaður, hevur borið lógaruppskot í løgtingi um fyrireiking, prosjektering og útbúð av Suðuroyartunlinum.

Kringvarpið skilur, at tað uppskotið verður lagt fram á tingfundinum í morgin. Tástaðni verður uppskotið alment í síni heild, m.a. hvørja linjuføring løgmaður nú mælir til.

Í vikuskiftinum hava Silas Olofson, formaður í Føroya Fuglafrøðifelag, og Jón í Haraldsstovu, formaður í Føroya Sílaveiðifelag, mælt frá hesi triðju linjuføringini, tí at teir halda tað fara at ganga út yvir náttúruøkið, sum er við Sandsvatn.

Breið, politisk undirtøka er sostatt ikki tryggjað fyri lógaruppskotinum um Suðuroyartunnil, sum væntandi verður lagt fyri løgtingið í morgin. 

Les eisini: Tann vánaligasta ætlanin higartil