Embætismaður: Flestu trupulleikarnir eru loystir

90 prosent av trupulleikunum millum Russland og Ukraina eru loystir, sigur ein amerikanskur embætismaður, sambært tíðindastovuni Reuters.

Umboð úr USA, Ukraina og Evropa eru enn í Berlin at umrøða eina friðarætlan millum Ukraina og Russland.

Í gjár vóru øki og vissa um trygd fyri Ukraina millum evnini, sum vórðu umrødd, sigur embætismaðurin.

Ukrainski samráðingarleiðarin og amerikanski sendimaðurin greiddu frá gongdini í samráðingunum seinnapartin í gjár.

Fleirtjóða herdeild

Noreg og fleiri onnur evropisk lond eru samd um fleiri punkt í eini ætlan um at enda kríggið í Ukraina.

Millum annað eru tey samd um eina fleirtjóða herdeild undir evropiskari leiðslu - stuðlað av USA - sum skal hjálpa til at endurreisa ukrainsku verjuna, tryggja ukrainska loftrúmið og skipa trygdina fram við strondini.

Fleirtjóða herdeildin verður eisini til staðar inni í Ukraina, stendur í felagsyvirlýsingini frá einum arbeiðsfundi í Berlin í gjárkvøldið.

Ukrainski forsetin, Volodymyr Zelenskyj, sigur, at samrøðurnar í gjár ikki hava verið lættar, men gevandi, skrivar NTB.