Føroyar uttan Elias ímóti Italia

Føroyski álopsarkitekturin Elias Ellefsen á Skipagøtu ger alt, hann kann, fyri at gerast klárur til EM-endaspælið.

Hann royndi seg við bólti til seinnapartsvenjingina við Tjarnir hósdagin, men situr undir øllum umstøðum uttanfyri í fyrra venjingardystinum ímóti Italia í annaðkvøld.

 - Vit missa sjálvandi kvalitet, tá Elias ikki spælir, men fleiri aðrir kunnu greiða uppgávurnar. Tað verður eitt fet fram fyri aðrar, sum fáa kjansin at vísa seg fram, segði venjarin Peter Bredsdorff-Larsen.

Venjarin nevndi millum annað avrikini hjá Paula Mittún og Róa Ellefsen á Skipagøtu ímóti Norra í Golden League, og hóast Tróndur Mikkelsen eisini ásannaði, at Kiel-spælskiparin sjálvsagt fyllir nógv á liðnum, eru hinir klárir at traðka til. 

 - Hetta er tað, vit gera, og tað er ikki nakað nýtt, um mann kemur á vøllin og skal kasta ein bólt, segði bakkurin, sum gleðir seg at spæla verjuspæl ímóti italiumonnum, sum millum annað hava roynt seg uttan strikuspælara og við fýra í bakketuni í staðin.

Venjingardysturin millum Føroyar og Italia byrjar í annaðkvøld klokkan 19.00 og kann stroymast á heimasíðuni hjá Kringvarpinum, kvf.fo.