Trump um Grønland: Siga tit nei, fara vit at minnast tað

- Tit kunnu siga ja, so eru vit takksom. Tit kunnu siga nei, so fara vit at minnast tað.

Amerikanski forsetin, Donald Trump, nýtti ein stóran part av røðu síni á búskaparliga toppfundinum í Davos í Sveis til at viðgera amerikanska kravið um Grønland.

- Alt, eg biði um, er eitt ísstykki. Tað er kalt og fjarskotið, men tað kann spæla ein týdningarmiklan leiklut fyri heimsfriðin og at verja heimin, segði Trump.

- Vit biðja ongantíð um nakað, og vit fáa heldur ongantíð nakað, uttan so at vit brúka vald, men tað fari eg ikki at gera, segði amerikanski forsetin.

Hann segði eisini, at USA tímir ikki at verja landaøki, sum tað ikki sjálvt eigur. Trump segði, at Grønland skal brúkast til ein verjuskjøldur undir navninum "Golden Dome."

Danir ótakksamir

Amerikanski forsetin segði, at Trump læt Danmark Grønland aftur eftir seinna heimsbardaga:

- Hvussu býtt var at gera tað? Og nú er Danmark ótakksamt, segði Trump, sum tók uppaftur, at USA hevur brúk fyri Grønlandi, av trygdarávum.

Hann fanst eisini at Danmark fyri ikki at verja Grønland:

- Í 2022 søgdu danir, at teir fóru at brúka 200 milliónir dollarar at styrkja verjuna í Grønlandi. Men sum tit vita, brúktu teir minni enn eitt prosent av hesi upphædd.