Danskir hermenn vóru til reiðar at svara USA aftur við vápnum

Danskir hermenn vóru til reiðar at brúka vápn, um USA gjørdi álvara av at taka Grønland við hermegi.

Tað skrivar danska kringvarpið í morgun í einari grein á heimasíðuni, sum byggir á innlit í boðini, sum donsku hermenninir fingu, tá teir vórðu sendir til Grønlands í síðstu viku.

Boðini komu av ovastu rók, og í teimum stendur, at danska verjan so skjótt sum tilbar skuldi styrkja møguleikan at seta verjuætlanina av Grønlandi í gongd, skrivar DR.

Danska kringvarpið skilir, at breið politisk undirtøka, ikki bara í stjórnini, men eisini í andstøðuni, var fyri at svara aftur, um USA leyp á.

Fleiri herfólk og útgerð til Grønlands

Boðini frá herleiðsluni lýstu eina hernaðarliga atsókn í fleiri pørtum, og at møguleiki seinni var at senda enn fleiri herfólk og útgerð til Grønlands. Og meira ítøkiliga var ætlanin, at danska verjan, við at vera meira sjónlig, skuldi styrkja virksemið í Grønlandi, fyri at vísa vilja og førleika at verja suverenitetin og territoriala integritetin hjá ríkisfelagsskapinum, skrivar DR.

Sten Rynning er professari á Syddansk Universitet og serfrøðingur í NATO:

- Hetta var ikki ein symbolsk venjing, har førleikin at flúgva langt verður vandur. Eg hevði ongantíð í lívinum roknað við, at tað skuldi koma so langt, at donsk herfólk vóru send til venjingar við løddum vápnum, tí mann hevði fyri neyðini at gletta á tonn ímóti USA, sigur hann.